Қолыңнан келсе алып қаш

Қысқаша мазмұны

Самал — 35 жастағы көңілді, тұрмысы жақсы, бірақ тым ырымшыл әйел. Жасына қарамастан тұрмысқа шығуға асықпайды, өйткені оның өмірі өзіне ұнайды. Ол жиі өзінің бал ашатын Роза ханымына барады және оған туған анасынан да артық сенеді. Бір күні Роза ханым оған тағдырлы хабар айтады: Самалдың болашақ күйеуі туралы жоғарғы жақтан белгі келгенін, егер оны тауып, оған тұрмысқа шықпаса, өмірінің бақытсыз болатынын жеткізеді.

Мистикалық жорамалға сеніп қалған Самал, адал құрбылары — батыл бұрынғы спортшы Сезім мен фанат астролог Светаны ертіп, тағдыр жазған ер адамды іздеуге шығады. Бәлгілерді қуып жүріп, олар шағын ауылға келеді. Мұндағы барлық деректер қарапайым, бірақ өте адал ауыл азаматы — Бақытқа әкеледі. Ол да әлі үйленбеген болып шығады. Алайда Самал жағдайды түсіндіргенде, Бақыт жай ғана күліп, бұл «тағдырлы спектакльге» қатысудан бас тартады.

Бірақ берілгісі келмеген Сезім,оны есінен тандырып, қыздар Бақытты қалаға алып қашады. Осылайша кейіпкерлер күлкілі әрі қауіпті оқиғаларға тап болады. Ақыры шындық ашылады: мұның бәрі айлакерлікпен қойылған жоспар екен. Ермек есімді жұмбақ ер адам, Самалдың өзіне тұрмысқа шығуы үшін балгерді сатып алған. Бірақ Розаның көмекшілерінің қателігі салдарынан Самал Ермекті емес, басқа ер адамды — Бақытты алып қашқан.

Ермек жоспарының күл-талқаны шыққанын түсінген соң, Самалды өз бетінше алып қашуға бел буады. Бірақ бұл кезде Самал мен Бақыттың арасында шынайы сезім пайда болып үлгерген еді. Бақыт, Самалды өмірінен жіберіп ала алмайтынын түсініп, оны құтқаруға және шынайы махаббаттың кез келген тағдыр болжамынан маңызды екенін дәлелдеуге шешім қабылдайды